А.Бойматов гуруҳи 13 Июнда тарқатган Билдиришномага бир жавоб

 

13 июнда Бойматов гуруҳи тарқатган Билдиришномада жуда кўп муттаҳамликларга йўл қўйилган. Мен уларни “муттаҳамликлар” деб аташимнинг сабаби шуки, мен улар қилаётган ишларга бошқача тузукроқ сўз топа олмадим. У ерда ёзилган нарсалар ичидан мен ўзимга тегишли бўлган қуйидаги 2 нарсага жавоб бермоқчиман:

1.                        Ўша гуруҳ ёзадики:” 23-24 май кунлари ЎХҲнинг Берлинда бўлиб ўтган қурултойига Ҳазратқул Худойберди жамиятимиз томонидан вакил қилиб жўнатилган экан. Бу нарсадан на бизнинг, на жамиятимиз президентининг хабари бўлган”.

 

Ўша пайтларда Каримовга ўхшаб, эшакдан тушса ҳам эшакни устига ёпилган тўқимдан тушмайдиган сизнинг президентингиз Бойматовнинг муддати аллақачон тугаган эди. Шу сабаб у билан маслаҳатлашишга менда зиғиртдек бўлсин қизиқиш бўлган эмас. Аммо ўзини кар ва кўрликка солаётган Бойматов ва унинг гуруҳига Толиб ака Ёқубов бир неча бор такрорлаган гапни мен яна такрорлашга мажбурман. Наилож, яхши эшакка бир хала, ёмон эшакка тўрт хала уриш керак бўлганидек, бу гуруҳга ҳам яна бир марта ўша гапни эслатишга мажбурман:

Толиб ака Ўзбекистон Халқ Ҳаракатидан таклиф келганда у киши таклифни Бойматовга йўллашни тавсия қилганлар, аммо у бу таклифни рад этган. Яъни ЎИҲЖ ЎХҲига қатнашмайди деган бир қарорга келган унинг ўзи.

 

Аммо бу одам уйламаган нарса шуки, ҳамма ҳам фақат Бойматовга ва Каримовга ўхшаб уйламайди. Демократик ташкилотларнинг энг кучли тарафи ҳам шунда. Демократик ташкилотларнинг аъзолари эркин фикрлаш ва фаолият юритиш ҳуқуқларига эгалар, токи у фаолиятлар жамият фаолиятининг умумий йўналишига қарши бўлмаса бўлди. Ҳар қандай таашкилот ичида турли туман фикрлар бўлиши бу табиий ва демократик ҳолатдир. Фақат коммунистиик партиялардагина ҳамма аъзолар партия секретари каби уйлашга, уни орқасидан қўйдек эргашиб юришга, раҳбар қўйган қадамдан бир қадам ҳам четга чиқмасликка мажбурлар. Коммунистларнинг ана шунақа моғорлаб кетган тартибини Ўзбекистон инсон ҳуқуқлари жамиятига ҳам татбиқ қиламан деганлар қаттиқ адашадилар ва пешоналарини танқиллатиб деворларга уриб олаверадилар - токи фаросатлари жойига тушмагунча.  

 

Менинг ЎИҲЖидаги фаолиятим у ҳали энди ташаббус гуруҳи томонидан ташкил қилина бошлаганда, “Бирлик”нинг Ёзувчилар Уюшмасидаги, Ёдгор ака Обидовнинг кабинетини штаб қилиб олган хонанинг қаршисидаги стол стул йўқ, бўм бўш хонада тортишувлар ва маслаҳатлар жараёнидан бошланган ва мана 22 йилдирки мен бу Жамият фаолиятида баҳоли қудрат қатнашиб келаяпман.

 

Менинг ЎХҲ фаолиятида  қатнашишимнинг асосий сабаби шундаки, мен диктатурага қарши курашда барча кучларни бирлаштириш ўта мўҳим нарса эканлигини ўша 1989 йиллардаёқ тушуниб етганман. Шу сабаб бир гуруҳ дўстлар билан 1992 йилда “Миллий Мажлис” жамоат ташкилотлар бирлашмасини тузиб, тузумга қарши кескинроқ кўринишдаги курашга киргааним боис “Давлатнинг қонуний структураларига қарши параллель структуралар тузиш йўли билан давлат тўнтаришига уриниш”да айбланиб 8 ойлик қамоқдан сўнг Ўзбекистон Олий Судида 5 йилга қаттиқ режимли қамоққа ҳукм қилинганман.  Фақатгина халқаро ташкилотларнинг аралашуви ва айниқса Халқаро Амнисти ва Human Rights Watch қаттиқ курашишлари оқибатида менга берилган жазо 5 йиллик оғир қамоқ ҳукми 3 йиллик шарт билан орқага сурилган. Шундан сўнг яна қамоққа тушмасликни қаттиқ аҳд қилиб Ўзбекистондан чиқиб кетишга мажбур бўлганман.

 

Ҳукуматнику тушунса бўлади мухолифатнинг ҳар қандай бирлашишига қарши кескин кураш бошлаб юборишини. Аммо ўзини ернинг киндигиман, Инсон ҳуқуқлари Жамиятининг Президентиман деб кеккайган бир одам ва унинг ҳамтовоқларининг мухолифатнинг навбатдаги бундай мўҳим бирлашмаси тузилишига тиш тирноғи билан қарши туришларини ёлғиз Аллоҳ ва унинг ўша гуноҳкор бандаларини ўзлари биладилар, холос.  

 

  

2.                        Ўша гуруҳдагиларнинг иккинчи иддаолари: ”Ҳазратқул Худойберди ЎИҲЖнинг охирги икки йилги фаолиятида ҳеч қандай иштирок этмаган” деган гап. Ростданми? Мен бирор мўҳим тадбирдан четда қолиб кетибманми? Ўзи мана шу 2 йил давомида жамиятнинг барча аъзолари учун умумий бўлган қанақа тадбир ўтказилди? Ҳеч қанақа.

Ҳамма ҳамишагидек, ҳуқуқлари топталган ва топталаётган инсонларга ўзларининг ёрдамларини баҳоли қудрат кўрсатиб келдилар. Мен жамиятимизнинг бошқа барча оддий аъзолари каби бирор Ҳисобот бериш мажбуриятини олмаганман. Аммо ҳозир кимгадир айнан мени фаолиятимни тафтиш қилишга иштиёқ туғилган экан, марҳамат, имкон қадар ўтган 2 йил даавомида қилган ишларимни бу ерда қисқача келтиришга ҳаракат қиламан.

Ўтган 2 йил давомида бошқа йилларга қараганда янада кўпроқ инсон ҳуқуқлари поймол қилинди, кўплаб журналистлар, инсон ҳуқуқлари курашчилари ва айниқса диндорларни қамоққа олишлар ва уларни узоқ муддатларга озодликдан маҳрум қилишлар кучайиб кетди.

Бу ҳақдаги барча материалларимни мен 2002 йилда очган сайтим www.stopdictatorkarimov.com  ва унга қўшимча равишда 2009 йилда очган 2нчи сайтим  http://forumuzbekistan.forum2x2.ru/  да доимий равишда, қарийб ҳар куни ёритиб бордим.

Бу икки сайтни мен ўзим, ўз пулларимга очганман ва уларни иккаласини ҳам ёлғиз ўзим бошқараман.

Мен 1989 йилдан бери инсон ҳуқуқлари курашчиси ва Каримов режимига қарши бир мухолифатчи сифатида фаолият юритар эканман, мана шу 22 давомида бирор жойдан 1 тийин, 1 копеек, 1 сент ёки 1 φre олмаганман. Буни мен атайлабдан қиламан -  токи бирор муттаҳам, бирор марта бўлсин мени курашимни бирор манфаат излаб қилаяпти деб тилини сал бўлсада қимирлата олмаслиги учун. Ундан ташқари мен инсон ҳуқуқлари поймол қилиниши ҳолларини нафақат ўз сайтларимда, балки Twitter, Faceebook, Aftonbladet, Rosbalt, Centrasia ва яна бошқа кўплаб сайтларда ҳам ёритиб боришга ҳаракат қилиб келаман. Шунча гапдан кейин Бойматовнинг мени фаолиятсизликда айблашга тили яна айланса “Ё астағфирулло!” дейман холос.

 

Ҳўш, яна кимни қандай иддаолари ёки талаблари бор менга? Яна қайси бир муттаҳамнинг арпасини хом ўрган эканман? Айтинг, бориб арпангизни бошқатдан бепул ўриб бераман.

Агар кимда кимнинг менга нисбаатан қандайдир жиддий иддаолари бўлса, марҳамат, чиқсин, гапирсин.

Агар бирор инсоннинг бирор жиддий иддаолари бўлмаса у ҳолда у одамлар бошқаларга халақит бермасдан, ўз инларида жимгина ўтираверсинлар. Диктатурага қарши курашга кира олмасанглар ҳеч бўлмаганда шу курашга кирганларга халақит берманглар эй осий бандалар!

 

Ҳазратқул Худойберди

2011 йил 15-июн

 

p.s. Бир қўшимча: Ушбу кунларда Ватанда ҳам, юрт ташқарисида ҳам бир қизиқ вазият юзага келди: Гуёки ҳамма Марсга учириладиган бир кемага “Старт!” деган буйруқ берилишини кутиб тургандай. Янги  Ҳаракатни тузилгани Каримов режимини саросимага солиб қўйди аммо айни пайтда у минглаб ватандошларимизнинг қалбларида умид учқунларини ҳам ёқа бошлади.

Режим минг чирангани билан фуқароларнинг кўз ва қулоқларини ёпа олмади. Ҳар кун бу дунёда бўлаётган улкан ўзгаришларни борган сари кўпроқ инсонлар эшита ва кўра бошладилар. Ойни этак билан ёпиб бўлмаганидек, Араб дунёсидаги буюк ва оламшумул халқ инқилоблари 20, 30 ва 40 йиллаб ўз тахти равонларига зулукдек ёпишиб олган золим диктаторларни бирин кетин ағдара бошладилар.

Муборак(Миср) ағдарилди. Бен Али(Тунис) ағдарилди. Абдулла Солиҳ(Яман) ағдарилди. Жоҳил Қаддофийнинг (Ливия) ҳам куни тугаб қолди. Жаҳолатга бўғзигача ботган Башар Асад(Сурия) қўрқувдан титраб, халқ инқилобига қарши оғир қуроллар ва армияни ташламоқда. Аммо бу кетишда у ўз жиноятларини янада чуқурлаштиради ҳолос. Қайси халқ бу дунёда унга қарши учоқлар ва танкларни ташлаган иблис раҳбарга тоқат қила олади. Ҳеч бир халқ!

Ана шу жоҳиллардан салгина бўлсин фарқи қолмаган Ислом Каримов ҳам шу кунларда жазавага тушиб қолди. Уни жазавага солаётган нарса  -  бу Ўзбекистон халқининг янгидан қўзғолиши бўлди. Ўзбекистон Халқ Ҳаракати қанотлари остида борган сари, кун сайин кучайиб бораётган фаолият, инсонларнинг Янгилик, Озодлик, Ҳуррият, Адолат каби қадриятларни қайтадан тикланишига бўлган орзу умидлари тўсатдан амалга оширса бўладиган кўринишларни ола бошлади.

Араб дунёсидаги шундай қудратли бўлган диктаторларнинг бирин кетин ағдарилиши шуни исбот қилдики, УШБУ ЗАМОНДА ХАЛҚНИ ТИНИМСИЗ БОСИМ ВА ҚЎРҚУВ ОСТИДА УЗОҚ МУДДАТ УШЛАБ ТУРИШ ВА АНА ШУНДАЙ УСУЛЛАР БИЛАН МАМЛАКАТНИ БОШҚАРИБ БЎЛМАС ЭКАН!!!

Ҳар қандай халқ, агар у истаса, ҳар қандай ҳукуматни, у нақадар қудратли бўлмасин, ағдариб ташлашга қодир экан! 

Шу сабаб бугун Каримовни пайтавасига қурт тушиб қолди. У гоҳ Россия, гоҳ Европа, гоҳ АҚШ пинжига суқилишга, улардан тасалли берувчи сўзларни эшитишга ўлгудек муштоқлигини яширолмай қолди.

Бугун у Шанхай гуруҳидан мадад кутмоқда, ўлиб тирилиб уларни ўзининг хавфсизлик режаларини қабул қилишга чақирмоқда. Бу жоҳил одам билмайдики, у ўзини қўрқоқлиги билан ҳаммага кулги бўлмоқда. Аммо у минг чиранмасин энди уни ҳеч нарса қутқариб қола олмайди: На Европа, на АҚШ, на Россия.

Бир пайтлар Мисрнинг жоҳил диктатори ҳам ана шу давлатларга қаттиқ ишонган эди. Аммо бу давлатларнинг раҳбаарлари жоҳил диктаторларга ўхшаб ахмоқ эмас. Улар ўзга давлатлар ҳукуматларини ўз манфаатлари йўлида вақтинча қўллаб қўвватлаб туришлари мумкин. Аммо улар ҳеч қачон ўзларининг турли туман мақсадлари йўлида бутун бошли бир халққа қарши бормайдилар. Борган тақдирларида эса Жорж Бушга ўхшаб башараларига ботинка аралаш тарсаки еб, кейин думларини қисиб қочишга мажбур бўладилар.

 

Шу сабаб Каримов, Иноятов ва Мирзиёевлар режими бугун Россияга ҳам, Европага ҳам, Хитойгаю АҚШга ҳам ишонмай қўя қолсинлар, агар уларда салгина бўлсада сиёсий онг бўлса. Бунинг ўрнига улар ҳокимиятдан тинчгина кетиш йўллари ҳақида уйлаб кўрсинлар.

Бу режим вакилларининг сиёсий онглари эски шкафда 22 йилдан бери нафталин сепиб осиб қўйилган эски пальтодек қотиб ва бўрқсаб кетгани аниқ, шу сабаб уларни эски шкафдан олиб чиқиб янги замоннинг соф ва тоза шабадаларидан нафас олдирмагунча уларнинг онгида ўзгариш ясаш амри маҳол бир нарса.

Режим вакилларининг аҳволику аниқ, хўш, бошқаларнинг аҳволи қанақа?

Бугун Ўзбекистон Халқ Ҳаракатига 4 хил муносабат мавжуд:

1.   Ҳаракат сафларига дадил кириб уни янада кучайтиришга ҳисса қўшиш

2.   Ҳаракат фаолиятига қарши турли туман йўллар билан халақит бериш, унга қарши тиш тирноғи билан қаршилик кўрсатиш

3.   Ҳаракатнинг жоҳил ва золим тузум билан бўладиган оғир курашларини фақат томошабин сифатида кузатиб ўтириш

4.   Ҳаракатнинг фаолиятини умуман қўллаш аммо курашнинг оғирлигини тушунган ҳолда, иссиқ жонни ва яна алламбалоларни уйлаб бу курашга қўшилмаслик

Ҳар бир даврда, ҳар бир инсон ҳаётида, турли муаммолар намоён бўлаверади ва у бизларни ТАНЛОВ қилишга мажбурлайверади. Ана ўшанда ҳар бир инсон қандайдир бир йўлни, ечимни танлашга мажбурдир. Бизнинг бугунимиз ва эртамиз, ҳаётимизнинг мазмуни, бахту саодатимиз ҳар куни қабул қилаётган ана шу ечимларимизга чамбарчас боғлиқдир.

Шу сабаб ҳар биримиздан бир оддий нарсага эътибор бериш ҳам фарз ҳам қарздир. У нарсанинг оти ҲАР ҚАНДАЙ ҚАРОР ҚАБУЛ ҚИЛИШДАН ОЛДИН БИР ДАҚИҚА БЎЛСАДА ФИКРЛАШ. АГАР БИЗ ЎЗИМИЗ ҚАРОР ҚАБУЛ ҚИЛИШГА, ЕЧИМ ТАНЛАШГА ҚИЙНАЛСАК У ҲОЛДА ОТА ОНАЛАР, ДЎСТУ БИРОДАРЛАР, АКА УКАЛАР БИЛАН МАСЛАҲАТ ҚИЛГАН ҲОЛДА ҚАРОР ҚАБУЛ ҚИЛГАНИМИЗ МАЪҚУЛ. ЧУНКИ БИЗНИНГ ҲАР БИР ҚАРОРИМИЗ ТЎҒРИДАН ТЎҒРИ БИЗНИНГ БУГУНГИ ВА ЭРТАНГИ ҲАЁТИМИЗГА ТАЪСИР ҚИЛИБ БОРАВЕРАДИ...  

 

2011 йил 16-июн