Қаттол Каримовга бағишланган мадҳия

Ҳайфдир санга исм, ҳайф сани номинг,

Ўткинчидур барча шуҳрату-шонинг.

Куфр тимсолидур руҳинг-вужудинг,

Мангу азоб ичра қийналсин жонинг!  

-----//-----//-----//----//------

Даврингни сур, кейин имкон топмассан,

Азоб бўлар, ҳаргиз омон топмассан.

Ажалинг етгунча тушма тахтингдан,

Шунда тавба қилиб, иймон топмассан!!

-----//-----//-----//----//------

Золим шоҳ тирикдир, яшар иззатда,

Сабаби халқ ваҳимада, даҳшатда.

Ўлгач бошланади ҳар ёкда қий-чув,

Мақтаганлар сўка бошлар албатта.

-----//-----//-----//----//------

Ҳали юраклардан кетмади алам,

Калтаклардан қолган битмади ярам.

Дилимда яна шу балоларга мен,

Мубтало бўлдиму кетмади бу ғам.

-----//-----//-----//----//------

Бир тинч, обод макон бўлса, истарман,

Зулмдан пок замон бўлса, истарман.

Афсус, ислом олам зулумотида,

Чиқиб ундан чароғон бўлса, истарман.

-----//-----//-----//----//------

Ҳамма бир овоздан деса- “доносиз,

Ниҳоятда буюк даҳо, танҳосиз”.

Подшо ҳам ишониб қолса, ажабмас,

Шундай зотлигига – бўлса Худосиз.

-----//-----//-----//----//------

Қари шоҳдан давлат кетдими дейман,

Навбат қизларига етдими дейман.

Охир-оқибат бу Ўзбекистонда,

Эркак зоти қуриб битдими дейман.

-----//-----//-----//----//------

Бу кунлар ҳам тарих бўлиб қоладир,

Билмадим ким қандай ибрат оладир?!

Золим шоҳ лаънатга қолар, бегумон,

Асли чин айбдор балки Таня холадир?!

-----//-----//-----//----//------

Халқимиз аҳволи хароб бўлдику,

Орзу-умидлари сароб бўлдику.

Халқ сайлаган подшо зулм этса халққа,

Бу азоб устига азоб бўлди-ку?!

-----//-----//-----//----//------

“Халқ сайлаган” деган сўз бўлдику удум,

Халқ номидан халққа ўқилар ҳукм.

Золим ҳам, мазлум ҳам халқ бўлса агар?,

Ҳеч тушунолмадим – “халқ” бу ўзи ким?!

-----//-----//-----//----//------

Бизда бор “қаҳрамон” деган бир нишон,

Ҳар йили топилар беш-ўн қаҳрамон.

Халқни қай оғирин енгил қилдилар?

Барчамиз ҳайронмиз: Ким у қахрамон?

-----//-----//-----//----//------

Дўстлар бу ажойиб бир замон бўлди,

Мусулмонларнинг ҳоли кўп ёмон бўлди.

Қанчаси қамалди, қанчаси қочди,

Равшан бўлди, кимлар-ким томон бўлди?!

-----//-----//-----//----//------

Замон маддоҳлари, ёзувчи, шоир,

Ёки машҳур юлдуз, ё шунга доир.

Мақтовпараст шоҳга маддоҳлик қилиб,

Бахтли ҳаёт завқин хўп сураётир.

-----//-----//-----//----//------

Қаранглар бундайин фитна замонга,

Не офатлар тушди Ўзбекистонга!

Мусулмонлар мусулмонлардан қочиб,

Ҳижрат қилди бугун кофиристонга!

-----//-----//-----//----//------

Тожу-тахт мафтункор бўлсада чунон,

Аллоҳни наздида йўқ қадри чандон.

Пашша қанотича қадри бўлганда,

Унга эришмасди Фиръавну – Ҳомон.

-----//-----//-----//----//------

Пасткашлар эришиб қолса давлатга,

Мубтало бўларкан ажиб иллатга.

Бу иллат тузалмас, бедаво экан,

Номи шуҳратпараст, тўймас шуҳратга.

-----//-----//-----//----//------

Кўз оч бўлса дунё билан тўймайди,

Қалб кўр бўлса меҳр ҳиссин туймайди.

Давлатига ғурурланар нодонлар,

”Аллоҳ мутакаббирларни суймайди”!

-----//-----//-----//----//------

Кўп одамлар ётар ҳибсда чандон,

Кўп одам нон излаб оввора сарсон.

Нега бундай дея сўраш мумкинмас,

Хафа бўлар агар эшитса султон.

-----//-----//-----//----//------

“Чарақлади” мустақиллик қуёши,

Куйлаймиз – “донодир, бизнинг юртбоши”.

Сабр қилиб ўн етти йил куйлабмиз,

Куйлаймиз етганча элнинг бардоши.

-----//-----//-----//----//------

Аксар шеърларимни ёздим зиндонда,

Бу ҳам бизга берилган оддий имконда.

Озодликда шеър ёзишга вақтим йўқ,

Ўйу-фикрим фақат бир парча нонда.

-----//-----//-----//----//------

Керак эмас эди курсинг бизларга,

Қолаверсин мерос бўлиб қизларга.

Бизга зулм қилмай тинч қўйсангиз бас,

Молу-мансаб қолаверсин сизларга.

-----//-----//-----//----//------

Билинг, бизлар юртни бузмоқчимасмиз,

Бошқача бир давлат қурмоқчимасмиз.

Асбобсиз, яроқсиз, тошқин дарёни,

Оқимига қарши сузмоқчимасмиз.

-----//-----//-----//----//------

Серқуёш… Куйладик қорда-бўронда,

Барчамиз жўр бўлиб шовқин-суронда.

Зўрлаб куйлатишди қуёш ҳақида,

Совуқ-зулмат ичра Ўзбекистонда.

-----//-----//-----//----//------

Ўлсанг зулминг камроқ бўлар эҳтимол?,

Сенга ҳам яхшироқ бўлар эҳтимол?!

Ўлмай узоқ давом этсанг зулмда,

Азобинг каттароқ бўлар эҳтимол?!

-----//-----//-----//----//------

Сен хоҳламасанг ҳам ўласан бир кун,

Қаро ер билан тенг бўласан бир кун!

Миллионлаб одамлар хотирасида,

Малъун, золим бўлиб қоласан бир кун!

Абутов М.М.